8鍋臭臭鍋 (金巴利道) (已結業)

其實有時經過都唔明呢間野做咩咁多人排隊，今次食完就知點解了！個名都叫得係臭臭鍋，又點會唔試下佢個招牌臭臭鍋呢，試下係咪真係好臭架先！我諗揀小辣係最好，始終有少少辣係惹味啲，可以試到真正既臭臭鍋，唔會俾辣味蓋哂原有既味道！我就加錢試埋佢個滷肉飯，而女朋友就叫左個番茄白豚鍋。其實佢最大既特色係一人一個鍋，咁樣一個人黎食又得，2個人黎食又食到唔同既湯底。招牌臭臭鍋其實又唔係真係好臭，怕臭既人都可以試下。一睇個鍋就知多料，大致有娃娃菜、白豚肉、貢丸、豬大腸、豬紅、米血糕、金菇、榨菜等等。當然唔少得主角個臭豆腐！嘩～正到呢，鍾意食臭豆腐既人真係必食！好香好香！滷肉飯其實都幾肥下，但係唔肥又點會好味呢！哈～其實呢＄12真係要俾，好好食，必推！番茄白豚鍋金桔檸檬梳打食火鍋就當然要飲凍飲啦，呢個好，解哂渴！整體黎講，真心不錯，下次一定要試埋佢其他鍋！