Cafe Terrace (已結業)

喺尖沙咀鬧市之中搵到呢間cafe terrace食個寧靜遊閒下午茶。呢間cafe terrace位於天台，戶外座位仲整咗好靚嘅特色花花牆，打卡一流。個三層架high tea set有個好靚嘅名叫<當海神遇上花仙子>，賣相都好精美，仲有乾冰製造嘅煙霧效果。最頂果層係甜點，有成6款，種類都算多，分別係伯爵茶奶凍、馬卡龍、迷你冬甩、布朗尼蛋糕、柑橘貝殼蛋糕同提子鬆餅。馬卡龍整得唔錯外脆內軟。貝殼蛋糕帶陣陣柑橘嘅清香，好fresh。鬆餅係比較脆身嘅口感，可以搽d士多啤梨果醬一齊食。鹹點方面全部都整得幾出色。最吸睛嘅當然係鱘魚黑魚子煙三文魚他他，面頭仲鋪有一大片金箔，黑魚子醬同三文魚他他嘅鹹香同鮮味好夾。另外仲有血腥瑪麗雞尾酒蝦，雞尾酒汁味道偏辣但配埋鮮甜嘅海蝦味道就啱啱好。至於蟹肉蘑菇酥皮盒，酥脆嘅外皮入邊釀咗蘑菇同蟹肉，唔錯。而最底果層係炸物小食，有沙嗲雞肉串、馬蘇里拉芝士棒、芝士焗青口同蒜香雞槌。雞肉串肉質嫩滑唔乾仲好香沙嗲味。炸芝士棒入面係軟心香濃芝士，點埋泰式辣醬就更加惹味。飲品方面，除咗咖啡亦都有花果茶可以揀，襯返哂靚靚嘅花牆。。。Cafe Terrace (尖沙咀)