圓山台灣料理 (已結業)

早幾日約左班朋友係尖沙咀食飯，佢地話想食台灣菜所以試下依間，係尖沙咀好難得搵到間坐得好舒服同傾到計嘅地方食台灣菜。圓山招牌炒飯 ($148)呢個招牌炒飯材料非常豐富，有蝦粒、叉燒、蝦米、蜆肉、煙肉同埋魷魚！未試過食一個炒飯咁多料！炒飯炒得色澤均衡並不是一件容易嘅事，這個炒飯就可以做到啦。加上飯粒炒得粒粒分明，口感煙韌，令人一試難忘。台式肉燥扒茄子 ($98)呢個好特别，同一般嘅魚香茄子完全唔同層次。茄子應該煎過嚟，所以外面好脆口，而咬落去竟然係腍而入味。伴埋肉燥好好味，撈飯食一流。屏東小炒 ($118)呢道菜帶有台灣地道味。蝦乾同魷魚帶鹹香，翠綠嘅韭菜好爽口，整體炒得好有鑊氣，惹味十足。 如果加埋枝冰凍嘅啤酒簡直一流呀！極品流沙包 ($35)我最鍾意食流沙包，可惜一客得三件。包好鬆軟，夠晒熱辣辣，一打開裡面金黃色嘅奶黃就流岀嚟喇，小心辣嘴呀。呢個真係萬分好食呀！