元朗合隆潮州粉麵 (德仁街)

营业中

休息中

有一日睇電視見到譚玉瑛姐姐介紹，睇嘅時候真係好想食，因為我都好鍾意食豬什，而且喺香港都唔係太多地方有得食，通常都係得牛雜，所以今日咁啱嚟到灣仔就去試一試。晚上8:00到，估唔到都咁多人，雖然唔使排隊，但都有九成滿座，所以唯有搭枱。嚟到當然要叫豬什啦，一早已經諗定要豬什河粉，不過原來有分大細，我喺度諗究竟大細有幾大嘅分別呢，由於又唔係十分肚餓，亦都係第一次嚟哩度，所以就叫咗一個細豬什河粉試下。細豬什好夠食，我個人覺得女生叫細嘅就啱啱好。豬什煮得啱啱好唔會太淋又唔會太硬，而湯底實在太好味！令我諗起胡椒豬肚湯！我都有落咗少少辣椒油喺匙羹度試吓，不過因為真係辣，我唔想蓋過個湯嘅味，所以食完一羹仔之後就冇再encore！其實仲有好多小食想試，但係實在太飽啦！根本就無辦法再食，唯有下次叫多一兩個朋友一齊嚟食，可以大家share。