Deli-O (已結業)

新都城二期無論飲食或者購物消費都比較集中，所以第一同第三期去嚫都係有目的咁去。今日煩緊食晏食咩好，同事提意行吓一期睇吓有咩啱食，發現有幾個英文字著咗燈，咁就行咗過去食晏喇。餐廳係先付款搵位坐低，拎住個牌仔會有職員送餐，幾貼心。食物方面粉麵飯薄餅咩都有啲種類算多，我哋叫咗兩個小食四個餐，主食嚟講味道真係有啲普通，反而小食有啲驚喜，而且價錢唔貴。香茅豬扒喇沙參參，嚟呢度食嘢學多樣嘢，參參係兩種粉麵兩溝撈埋一齊，湯都可以，但豬扒有啲乾，而且似係預先整定。焗芝士海鮮龍蝦汁飯，海鮮唔多，汁少，飯有啲乾。卡邦尼意粉，個汁嘅忌廉唔夠，味道都可以。日式脆炸生蠔拼魚柳珍珠飯·麵豉湯，炸蠔，魚柳，洋蔥圈各兩件，係新鮮炸起，魚柳都唔錯，蠔無咩味，洋蔥圈有啲硬。煙肉蘑菇薯蓉，都幾大份，薯蓉幼滑，味道鹹度適中，唔錯。蜜糖雞翼，有五隻，夠大隻，外面嘅皮少夠乾有蜜糖味又唔會太甜，裏面又夠滑。左上係抺茶牛奶，太甜，右上係焦糖咖啡，咖啡味唔夠濃。