醋娘子 (已結業)

十幾年前，上海麵食小籠包大行其道，至今已經飽和。好多連鎖店都縮減甚至執笠，反而位於上環永樂街嘅醋娘子認為仲有得撈。無他嘅，只要有質素，佢呢個舖位應該做得住嘅。醋娘子新開冇耐，仍然在試業階段。新店人頭湧湧，我索性外賣。一個擔擔麵餐連兩隻小籠包同嘢飲$40，價錢商宜。啲人鍾意食小籠包，所以叫多咗兩籠(一籠四隻$26)。新張係慢啲，等咗大概15分鐘，算ok啦。等緊外賣時，店內飄來陣陣香味，似乎湯底會唔錯。好啦，見真章啦。打開盒麵，湯少，可能係外賣，但係由店到食相隔三分唔會多。肉醬尚算香口，榨菜多，味道功高蓋主，超微辣，麵稔(因為外賣掛)，未至於難食，不過唔似擔擔麵。撈埋花生醬雖然彌補部分不足，都難挽小弟對此麵嘅不滿。反之小籠包都幾好食，皮滑有汁，肉餡唔羶，唔點醋都唔膩，有水準。不過，我叫兩籠加埋套餐果兩隻應該有十隻，點解得八隻，又係忙中有錯掛。唔好意思都要講，如果真係想做落去，啲麵真係要攪攪佢。