翡翠拉麵小籠包 (已結業)

今晚同太太去晚飯，小籠包好似其它食家講一樣，黐住墊底的菜，而且一夾就穿，以翡翠來說真的很少很少見。另外，從來冇人問過我地剪唔剪麵，張單已經寫住要剪。最差的是，所有服務生連經理都好似打仗咁，唔知趕緊乜。我太太今日要食藥，同侍應講要杯水，就二話不說連杯茶都收埋。喂！我話要杯水，唔係換杯水，你有冇聽清楚？食完小籠包想食埋墊底的菜，點知個小姐問都冇問就成個籠收走。我覺得就算我鍾意食埋幾塊菜係怪，你都問聲我先收走好喎。另一位待應冇耐過來檢查上齊菜未，問我地要唔要甜品，你服務質素如此「優良」，我原本食都變唔食（原本我地都想加野食，畀佢搞得幾搞，返屋企煮麵好過，仲食甜品？）。佢居然即刻在我地面前用對講機叫人印定單，你咁叫做點先？係咪好唔耐煩想趕我走？老實講，你拎轉背咁做我唔理你，亦理你唔到，不過你咁高調叫我走，我都唔會逆你意。埋單時，我同個經理講我呢餐係歷來在翡翠食得最唔愉快的一次，佢好簡單地問「點解？」我真係好想知佢覺得自己係我老豆定老細，居然唔係話「唔好意思呀，先生，唔知邊方面令您唔開心呢？」之類，唉！仲有乜好講？總之各位想去呢間翡翠之前，都係諗清楚，唔係洗錢之餘，仲要受氣。