皇茶冰室 (已結業)

天氣凍，不想煮飯洗碗，又去左食完野先返屋企，去左新開不久的皇茶冰室，同事食過話幾好喎，試下佢先。點了小菜套餐，每款小菜送例湯及白飯一碗，餐飲要另外加錢。先送上是日餐湯，紅蘿蔔湯來的，幾清甜。椒鹽鮮魷（$75）出街食小菜最鍾意叫炸野，屋企整麻煩吖嘛。炸得好香口，炸粉不算太厚，椒鹽亦下得夠多，彈牙魷魚好味喎。芝士魚柳扒西蘭花（$78）西蘭花出水太多溝稀哂啲芝士汁添，味道都ok嘅，魚柳同西蘭花都好多，份量撘救。沙嗲金菇肥牛粉絲煲（$68）朋友話好想食肥牛而點左呢樣，嘩，超大煲呀！肥牛粉絲椰菜等樣樣都好多，沙嗲汁幾惹味，有加菠蘿係入面㗎，正喎。熱奶茶（+$6）朋友追加了熱奶茶，茶香奶滑又夠熱，好飲。奶茶紅豆冰（+$12）自己想食下甜野要左紅豆冰，紅豆煮得軟腍不過甜，冰奶茶又正，好好飲！兩個人叫左三樣小菜，多左碗飯食唔哂添呀…