悅來酒店咖啡室 (已結業)

一直都想嚟呢度食自助餐，價錢唔貴，評語亦唔錯，而且重有個Playroom，好適合帶一啲無耐性又坐唔定嘅小朋友嚟。餐廳座位寬落，坐得舒適，食物方面雖然選擇唔算多，亦唔係有好高評價，但以呢個價錢性價比係高，而且職員有禮勤收碟，服務唔錯。小朋友食咗少少嘢後去咗遊戲室玩，成晚都好開心。蝦肉結實有鮮味，蟹腳鹹味適中，平時怕麻煩只會食一兩隻龍蝦仔，今次都食多幾隻。麵包蟹就無咩味，翡翠螺有殻碎。刺身類希靈魚最好 ，壽司就麻麻喇。火腿唔會太鹹。地中海燴海鮮好味，湯底係龍蝦湯味。自選粉麵，客人可以攞一個不銹鋼碗夾一啲想要嘅配料以及粉麵比職員烹調，湯底有 喇沙湯，清湯，牛肉湯可選擇。牛湯好鞋，其他都係丸類為多。甜品種類多味道唔錯，由其拿破崙同焦糖燉蛋。任食Movenpick雪糕有三種味。