HeySoNuts

营业中

休息中

最近喺網上面成日都見人介紹土瓜灣北帝街有一間超好食嘅西餐，於是今日就特登約埋屋企人一齊嚟食吓，見到門面嘅設計幾特別，入到去剛剛坐埋最尾兩個位，雖然只係7:00 ，但已經坐滿晒，以咁樣嘅人氣，都對食物好有期望。睇完餐牌之後，見到有個soup of the day，店員話今日係紅菜頭蘋果湯，聽落好特別，飲囉覺得忌廉味好重，加埋有蘋果，所以都好甜，但係都有啲紅菜頭嘅後勁，算係幾特別嘅組合。另外就叫咗一個白酒煮活蜆配蒜蓉包，d蜆相當大隻，好新鮮，同埋因為蒜蓉份量都好多，食落好香，白酒亦都唔會過濃，蒜蓉包整得好酥脆，真係好好食。香料牛油烤春雞伴印度香飯需要等佢煮一陣先至可以上到枱，但係份量完全係足夠二人食得好飽，隻雞燒得好嫩滑，重點就在於個印度飯口感比一般街食到嘅硬，所以覺得更加正宗！最後就係個羊肉醬炒貓耳朵意粉，個醬汁整得好好食，貓耳朵意粉嘅口感亦都控制得剛剛好，加埋有芝士粒，所以成個口感好飽滿。本身見到呢度有好多甜品都好吸引，但係今次真係叫得太多嘢，下次嚟一定會再叫甜品！