好欣賞店主對食物嘅用心同熱誠！好細心地簡介菜式，感受到所有食物絕對係店主嘅心機之作。店主亦會有禮貌地問食後感。
赤拉麵：櫻花蝦做湯底，唔算油膩，帶點七味粉嘅微辣。天婦羅櫻花蝦餅幾有新鮮感，紫菜好巨型，叉燒亦有輕輕燒過嘅味道
限定雞湯拉麵：雞湯一啲都唔重口，唔油膩，食落非常清爽（店主有提及希望可以令拉麵健康啲，清新啲，所以專登隔好多次油）
串燒：最欣賞鹽燒雞腎同汁燒翠玉瓜，雞腎燒到剛剛好，絕對唔會韌；翠玉瓜嘅汁有啲柚子味，好夾
即使成間舖只有店主一腳踢，亦無手忙腳亂。價錢每碗唔過一百，但絕對拍得住好多收百幾蚊嘅拉麵店。倘若你亦喜歡小店拉麵，歡迎一試！✊🏻
