拍板小館 (已結業)

三叔登6之日，一行7人揀左拍板小館食飯。預早訂位，亦預訂了半隻炸子雞。可幸長輩們食得都幾滿意，碟碟清有幾樣食物都幾出色，特意紀錄一下。當紅炸子雞（半隻）（$178）唯一預訂嘅菜式，雞皮炸得鬆脆，好似食薯片咁，卡滋卡滋。雞肉幾滑，點唔點淮鹽都得。鮑魚汁柚皮鵝掌煲（$168）柚皮要整得好食，一啲都唔簡單。呢味餸得以做到招牌菜，果然有佢嘅特別之處。入口軟綿綿，又冇苦澀味，最重要係吸收到鮑魚汁嘅味道。鵝掌好淋好入味，膠質豐富。秘製蜜絲骨（$88）甜甜地嘅炸排骨，送飯一流！金沙茄子（$68）鹹蛋黃同茄子，簡單的食材，製作出一道惹味香口嘅小菜。濃味嘅鹹蛋黃配上軟軟嘅茄子，原來係好夾架！臨尾一齊切個生日蛋糕慶祝一下，呢度仲要唔收切餅費呢。