平成 (已結業)

今日約咗朋友出嚟聚聚舊，去咗一間佢去開嘅居酒屋-平成。餐廳細細間，環境擺設同日本居酒屋相似，氣氛唔錯。一坐底我地就叫左兩杯野飲，邊飲邊傾邊等嘢食，我哋分別叫咗士多啤梨乳酸梳打同百香果乳酸梳打。嘢飲大大杯，好襟飲，啱晒我哋兩個慢慢吹水。兩杯乳酸都唔錯，味道足，百香果配乳酸異常地夾。叫左一個主食share食，黑松露牛肉稻庭湯烏冬，上枱已經覺得好香黑松露味，稻庭烏冬十分爽滑彈牙，食食下忍唔住飲晒d湯。另外叫左一堆串燒食，分別係雞肉串、雞腎串、雞翼串同雞皮串，燒得岩岩好，熱辣辣入口，正，特別推介雞翼串。Overall 都幾滿意今餐d野食，同朋友仔傾計食好東西，一生一大樂事也。另外提一提，8:30後有八折就更加抵了。