松記糖水店

松記對本人o黎講真係好"隔涉",
但都特登搭車入去試﹐
事關幾年前去試o既時候竟然誤進同區另一間松記﹐
今次點都要試o下呢間話係原店o既松記。

下午去到﹐好彩唔駛等位﹐
見比較疏落就坐左o係張細細四人檯。
一坐低梗係點左個幻彩明珠先啦﹐
但係又衰貪心﹐另加左個芝麻雪糕球﹐
o黎到就知道唔好喇﹐因為阿姐放低碗甜品時好求其﹐
D芒果汁見漏晒o係碟上面﹐跟住芝麻雪糕又溶得快﹐
當堂變左淡味o既灰色明珠﹐芒果得兩條﹐嗚.....
不過十幾蚊﹐都算係o甘啦﹗

一場o黎到﹐食一樣就閃又好似好浪費﹐
就點多個三寶湯丸﹐其中一粒換做綠茶奶黃。
等o左一陣上桌﹐薑湯ok﹐不過淡左D﹐同埋熱D仲好。
至於湯丸本身﹐皮算係薄薄滑滑﹐
已經跟佢地建議次序﹐先食奶黃然後花生最後芝麻﹐
但唔知點解食完又唔覺得好食。

地方o黎講就麻麻地啦﹐因為有o的唔乾淨。
順帶一提﹐坐低後有兩個阿姐就一直叫D人埋黎坐﹐
但係外面明明有好多檯未坐滿﹐
有三個客入黎﹐佢地都硬叫人埋黎搭檯﹐
人地都皺晒眉頭﹐問外面仲有幾張檯﹐點解要坐呢張﹖
好心啦﹐下午又唔係繁忙時間﹐
唔駛計到o甘盡丫嘛?!
坐都坐得唔舒服﹐食完只想快o的閃(阿姐求之不得)
會唔會專程o黎多次?
睇在地方同服務上﹐我就唔會o甘神心。