一直都唔知嘉里酒店嗰度有個Food Court，其實佢又唔算係屬於酒店嘅，除咗Food Court之外，仲有呢間新開嘅扒房，雖然餐廳唔係酒店入面，但係同樣有海景嫁~
黎呢到必試係佢地嘅熟成牛扒，高質嘅牛扒熟成咗80日，而得我同朋友兩個人，我地就揀咗Dry-aged T-bone Steak (650g)，因為一件T骨牛扒係夠兩個人食嘅。T字形嘅骨，將牛肉區分成西冷同牛柳，較為長身嗰邊就係西冷，而圓形較細嘅則係牛柳。上枱時，牛扒同骨已分開咗，方便食用，我地嗌咗5成熟，西冷中間嘅部份煎得啱啱好，經過熟成嘅牛扒會比一般嘅牛扒更加嫩口，肉汁相對較少，但係一啲都唔覺係乾身，比一般嘅牛扒，牛香會係口中留有少少餘韻。相反牛柳就有啲煎得過熟啦，差唔多接近全熟，雖然望落顏色無粉嫩嘅牛肉吸引，但係質感同樣軟淋，不過個人鍾意西冷多啲，唔止因為佢煎得啱啱好，仲因為佢帶少少脂肪，所以牛香會突出啲。
伴隨牛扒嘅有酸瓜、芥辣醬、胡椒忌廉汁同三款鹽，之後再配上大量嘅蔬菜，好似有烤茄子、翠玉瓜、露荀、甘荀、蕃茄等，另外仲有焗薯配酸忌廉同紅酒燴梨添，真係超級豐富，本身唔知有咁多配菜，仲擔心唔夠食，其實兩個人真係食到幾飽
因為無諗到個牛扒會跟咗咗多配菜，所以我地仲叫咗個Homemade Linguine (Tomato Base)，由於有牛扒同我又唔食得海觧嘅關係，我地就無再加料，本身無抱太大期望，但係反而有驚喜和!! 手製嘅意粉好彈牙，同現成嘅意粉真係幾大分別，雖然我地無加配料，但係原本蕃茄醬汁味道幾豐富，似係新鮮蕃茄蓉整嘅，表面仲佈滿芝士片，芝士溶咗，可以整成拉絲嘅效果，唔錯唔錯
