Darci by Aldou (已結業)

去完天后廟求簽，朋友話有家食麻辣燙好好食，但又認唔到路，就帶咗我去搵，不過搵嚟搵去都搵唔到，之後俾啲間餐廳吸引着，見佢裝修得幾靚，都幾多人食，再加埋我哋行得好攰，就決定入去食了。叫咗個蟹肉野菌忌廉意大利飯，$78，價錢已經包左餐湯同一杯飲品，買單嗰陣時先發覺原來唔使+1 ，呢個非常之好，計返都幾抵食。首先上咗個薄餅先，第一次食啲種薄餅，可以沾黑醋橄欖油，食法幾特別，原本以為硬繃繃，食落又軟身。南瓜湯好濃郁，食過咁多間西餐廳，呢一間嘅南瓜湯係惟一令我想飲多一碗。跟住花茶到咗，叫咗個玫瑰黃金桂，用茶袋裝住d花茶，浸左一陣，已經有好香嘅玫瑰味。最期待嘅意大利飯上枱啦，一上枱時已經有好大浸芝士蟹肉味，朋友都忍唔住試左兩啖。每粒飯都有滿滿的忌廉汁，真係冇令到我失望，店主都好有誠意，好多蟹肉，再同蟹子一齊食，有幾種口感的層次😂😂細看餐廳的裝修，令人感覺好寫意，出菜位放左好多酒類，相信佢哋調酒方面一定都好出色，有機會下次一定會試下。