板上 (中海日升中心) (已結業)

星期日出嚟食夜晚，唔想同人逼，想靜靜地食個晚飯休息一下，特登揀咗唔係商場而且可以無時限任坐嘅呢間板上食夜晚。入到去見到環境好寧靜，而且唔多人，地方好寬敞，感覺都好舒適。兩個人食叫咗一份小食拼盤，入面有炸魷魚圈，炸蠔，炸芝士魚腐，炸薯角，同埋炸單邊有骨雞翼，由於佢係新鮮炸起，食落好脆，但就會比較熱。我哋仲叫咗個至尊薄餅，至尊薄餅個批邊係包，包比較厚身，批邊好脆，不過如果薄餅料同埋芝士多啲就好啦，跟餐加咗$10要左杯紅豆抹茶奶茶，唔太甜，飲到抹茶味。最後仲叫咗個蒜香三文魚燒極黑豚珍珠飯，蒜香三文魚啱啱燒起，食到有汁，黑豚肉都唔太硬，本身睇落以為幾乾身，但跟配料例如牛油粟米同埋黑木耳一齊食又覺得幾夾，都食到有肉汁，跟餐免費送咗杯玫瑰花茶，茶包見到粒粒玫瑰花，而且都聞到玫瑰花香，星期日可以咁樣一路嘆茶一路同朋友傾計都幾舒服，喜歡呢種寧靜休閒嘅感覺，可以從平日繁忙嘅生活中休息下。👍