天仁茗茶 (荃灣廣場)

营业中

休息中

今日嚟到荃灣試玉子燒(見另文)，天氣持續熱辣辣，又餓又焗企喺街邊，先感受到全球暖化對人類嘅影響消暑解渴，飲杯凍嘢咪得囉，但難得食好西，點會求其飲杯凍嘢就算呀？所以寧願行20分鐘，都要買杯珍珠奶茶。舖面位於一田超級市場，舖細但客人不絶，提供冰飲同熱飲嘅茶類以及茶葉茶包等產品。要試一間台式飲品店，珍珠奶茶一定係指標項目。店方好溫馨咁出告示，提醒客人可選少甜少冰。冰珍珠奶茶$19茶底濃郁，茶味真同有天然澀味，所以飲完有回甘；奶味香醇，質感幼滑，甜度適中，珍珠唔會一咬就散，亦唔會腍坺坺，Q彈有咬口。最緊要係，飲完唔會頂胃，呢啲先係真正珍珠奶茶嘅味道，正！冰蜂蜜檸檬紅茶$22茶底夠醇，配咩都好飲。天然蜜糖甜味溫和地融合檸檬嘅微酸，似茶記檸茶但唔會死甜，多飲都無咳，舒服晒。珍珠奶茶可謂最成功打入香港嘅台式食品，自從上世紀九十年代，由MK潮物到而家梗有一間喺左近。但供應多需求大，價格競爭下會有人濫竽充數，混水摸魚，甚至為求降低成本，將傳統食品變成化學品雞尾酒，一飲就怕怕。難得天仁堅持用天然材料，而且保持台式傳統風味，但如果可以比客人選擇加埋胚芽就真係錦上添花喇。