New York Cafe & Bar (已結業)

放大假無乜特別節目，專登老遠慕名而來，試試係咪真係咁正。去到剛剛下午兩點，但仍有數人在外面排隊等位，唔係馬？餐廳位於小型商場外面，面積不大而且裝修普通，侍應亦普通便服上陣，杯碟刀叉都無乜特別，咁點解外面傾盆大雨重咁多人？坐低叫一客4安士牛柳午餐，餐湯明顯係自家製，唔太大碗但幾好味，可惜唔知個湯的名字。戲肉係牛柳加炸薯角，嘩嘩嘩，擺碟好pro，有酒店水準喎；件牛柳唔太大件，但好新鮮而且好鬆軟兼且係炭燒，唔似一般餐廳只係用鑊煎，味道差天共地呢，牛柳非常好味，唔鹹有鮮味；薯角亦好食，火候剛剛好唔會熱氣，份量亦足夠；咖啡亦係即磨，都好有水準。餐廳唔收加一，埋單$68，下次一定會試8安士牛柳午餐($118)。總括而言，呢餐好滿足，咁既價錢都有件咁正斗既炭燒牛柳（我的至愛），而家真係可以話絕無僅有囉，上次去扒XX王食個下午茶垃圾扒餐都要呢個價錢啦；唯一要彈既，就係人多食得唔多舒服，而且餐廳收三點鐘，兩點半打後已經唔想收新客，食得好似比較趕咁。不過咁既價錢咁既食物質素，重想點？下次一定會番焯，因為其他套餐睇落都好有水準咁喎。