三分俗氣 (已結業)

跟朋友係新蒲崗附近買完模型，見餓餓地都費事行返去黃大山了，就係呢邊開埋餐先。行過見到店名幾有自嘲意味，就一於入黎睇下有幾俗。打開餐牌都係上海菜就點指兵兵，嗌左以下呢幾樣。三鮮炒年糕有蝦／火腿／津白配年糕。味道算係中規中矩，加返啲辣椒醬去提味會好食。年糕入口軟身，可惜係蝦仁偏散硬，令整體不太配合。炒鱔糊。艽菜同鱔魚比例大約各一半所以食落唔會好膩，味道偏甜一點適合餸飯/麵或者包，唔好晒左個汁。而鱔肉爽口,粗幼適中，大約係筷子般大小所以咬口覺不錯。艽菜只用上白色部分所以食時左香口亦帶點业甜。素鵝卷。食落發覺同飲茶時食嘅腐皮卷如出一徹，但調味就濃一點有多點嘅燒烤味道。入面材料有蘿蔔絲／白菜絲／金針菇等，所以食落口感都幾豐富。素菜包。本身想食呢度嘅生煎包，點知朋友落錯左。既然送左黎就食埋啦，味道淡淡地但食得出係即叫即蒸所以個包好鬆軟。內餡有冬菇／艽菜／白菜／椰菜等，食落都有好香胡椒味道，減低左蒸菜包嘅草青味。唔錯。整體食嘅都唔錯，店員又會跟顧客談笑風生境氣氛造到幾融洽。三分俗氣得黎，包含七分鄰里感覺。