漁民麵館 (已結業)

噚晚嘅氣溫低過10度, 不過再凍, 工仍然要返, 生活仍然要過, 所以決定對自己好D, 今晚去漁民麵館食花膠大餐!漁民麵館喺元朗廣場巴士總站附近, 位置唔難揾, 小店內裡格局唔錯, 坐位多, 但檯唔會排得太密太迫, 坐得舒適, 樓面姐姐們有禮貌有笑容, 第一印象唔錯! 餐牌只有一張分底面兩頁, 一面是碗仔翅、粉麵及燉品類, 另一面是小食類及飲品類, 今次嚟嘅目的係花膠, 所以一次過叫咗花膠蠔汁撈麵($48)及花膠紅棗燉奶($55)。花膠蠔汁撈麵先上, 花膠份量認真唔算少, 連同伴碟嘅冬菇都炆得入味, 蠔汁唔會過咸, 撈麵可選擇幼麵或粗麵, 今次嘗試了粗麵, 粗麵掛滿蠔汁, 回味無窮! 呢個撈麵CP值真係極高!接住上花膠紅棗燉奶, 盅內嘅花膠份量同樣多, 加入少量紅棗及薑片, 燉奶味道清甜帶有輕微薑辣味, 喺咁凍嘅天氣下可以好好食個咁滋潤嘅燉品, 算係忙碌生活中一點小安慰。題外話, 樓面姐姐貼心安排, 喺我差唔多食完撈麵先上燉奶, 本身如果淨叫燉奶其實係唔駛等咁耐, 不過我想食完咸先再甜, 多謝樓面姐姐肯遷就我。下次再嚟時會試湯麵同其他燉品!