Cafe&Meal MUJI (已結業)

相識滿天下如木嘴都會有寂莫嘅時候，平時如果得自己一個人，通常都係去D連鎖快餐店就算數，反正好多顧客都係寂寞人，無咁老尷。今日木嘴就正正係得一丁友食Lunch，但今日又突然想食好少少唔想咁頹，又要一個人食唔老尷，又要有D質素，最終喺腦海就浮現呢間野。木嘴其實就黎過呢間野唔少次，每當做緊寂寞人或者有時行開海港城諗唔到食咩既時候就會揀呢間，因為間野通常都無乜人同幾好食，木嘴依家連佢個餐牌都差唔多識背咁滯。今次就試佢個All day breakfast，之前每次望餐牌都覺得幾靚幾有日式味但又驚唔飽所以無嗌。個餐好似好少野但食落又覺得幾豐富，個麥皮好足料，好多生果同提子乾，但木嘴就覺得甜左少少。至於條腸其實幾好食，但塊腸皮真係好厚，仲厚皮過木嘴D腳皮，食落去好似食香口膠咁咬勁耐都未咬得爛。火雞片、蘆筍同Egg benedict都唔錯，味道好清新。順帶一提，之前食過佢D幾餸飯，漢堡，三文治果D都幾好食，但就建議唔好食咖哩，因為味道極普通。不過總括黎講，如果閣下都係一個寂寞人，去開呢頭不妨黎呢間野一試，話唔定木嘴都咁岩坐喺隔黎枱享受緊寂寞安靜既感覺。