閨•家 (寶榮大廈) (已結業)

又去家姐屋企晚飯，因為無時間煮同洗碗，所以我哋通常都係買外賣，亦變相令我多咗機會試到北角嘅餐廳。呢日其中一些外賣就係喺閨家度買，係家姐姐夫其中一間經常光顧嘅小店呢！閨家係一間良心小店，主打家常小菜及無味精湯，而且飯麵都係四五十元，價錢親民，難怪深受街坊歡迎。我哋點咗三個飯，每個飯都送無味精老火湯一碗。香煎蓮藕餅豬扒飯($50)蓮藕餅及豬扒都係店內招牌，確係名不虛傳。蓮藕餅全人手剁，煎得表面焦香，食落口感爽脆！豬扒肉質軟腍入味，開頭以為係因為落咗鬆肉粉，聽返原來佢哋係以雪梨汁醃肉，再以人手逐塊揼鬆，所以豬扒先會咁腍身之餘又多咗一份果甜。白飯淋上甜豉油，配以蔥油及雪菜，好送飯！如果豬扒厚身一D就更好啦！慢煮豬軟骨飯($48)豬軟骨慢煮到鬆化軟腍，醬汁甜甜地，好容易送飯！份量亦好足，抵食！梅子金沙骨飯($50)金沙骨好入味，肉質同樣鬆化，入口化開，調味亦啱啱好，甜甜酸酸，好開胃。呢日嘅例湯是青紅蘿蔔湯，飲得出真材實料，無添加味精，有住家感覺！