上海老正興飯店 (已結業)

母親節唔想出去逼, 近近地響屋企附近食, 第一次幫襯呢間老正興。七點去到, 發覺所有大檯都留o左俾人, 店員見我o地齊人, 立刻醒目咁俾張檯我o地先。讚!雖然有母親節餐, 但係我o地六個大人兩個細路最後叫個4-5人五菜一湯晚飯套餐(只係二百幾蚊), 侍應無黑面, 依然殷勤落單, 讚!菜上得快, 但係可以接受, 母親節間間食肆都想做多幾輪, 明白o既。套餐點o左: 炒膳糊、糖醋魚塊、紅燒豆腐、醉雞、蒜蓉白菜仔、雲吞雞湯外加: 小籠飽(一客八隻)、窩貼(六隻)同豆沙窩餅炒膳、醉雞同魚塊都好正! 食到兩個細路"黏黏利"。係細碟d唧。紅燒豆腐皮生粉要再多d, 唔夠入味。蒜蓉白菜仔普通。雲吞雞湯好大煲, 有半隻雞, 抵!小籠飽皮夠薄, 但係肉汁唔多。窩貼不過不失, 如果多d肉汁更好。豆沙窩餅唔太甜, 幾好, 可惜皮稍厚。一家大細o黎食o既話, 係幾好o既選擇。環境係差d, 坐得逼同嘈, 但都叫企理。