秘苑韓國料理 (已結業)

呢個商場一星期六、日就水靜河飛，鬼影都唔多隻，如果唔係爸爸喺中環做野，絕對唔會知有呢間鋪頭。店中全為韓國人居多，所以唔明中文、英文都唔太明。所以我明明話要西冷佢地俾左牛肩我，算啦費事換了。燒肉的水準幾好，啲肉都醃得好入味、但不會蓋過肉鮮。牛舌好好味，薄薄的一片但就有好多汁同有好香的牛味。唔洗點其他野，加少少鹽已經好好了。雞肉都唔錯，幾鮮嫩，份量剛剛好。但牛肩肉真係唔得，冇肉食得骨，而且仲燒好耐都好似唔熟、食落有渣。麻辣豆腐湯是包括在2人燒肉套餐內，三個人食、一人一細碗差唔多。湯的味道除了辣味、其他味都是淡淡的，可能不太適合香港人的口味。我本人就鐘意中式老火湯多啲，但不得不讚個豆腐真係好清好滑，幾開胃。小食蔥油餅平平無其，似加左少少蔥的煎蛋餅多啲。蔥味不濃不突出，好彩佢地控制油份控制得唔錯，冇煎到好油，如果好油我真係食唔到落去。個石頭窩飯睇落好靚，用料好足…個碗亦都好夠熱，一落醬有滋滋聲、出曬煙咁，好好氣氛。碗底有飯焦，呢樣係我意想不到的。美中不足之處係個醬冇咩味，如果個醬料可以香濃啲就滿足了。