悠蔬食 (渣甸中心) (已結業)

屋企人介紹，銅鑼灣有間食素菜嘅地方，味道唔錯，所以趁今日過開海，過咗去食。餐廳喺渣甸中心25樓，要預少少時間搭升機。地方唔算太大，但勝在裝修清新，喺鬧市中搵到呢種感覺，相當唔錯。午市時間可以叫套餐食，都可以單點。今日叫咗個餐，先係前菜，一碗鳳梨蔬果藜麥沙律配胡麻醬，上面加咗藜麥，感覺更加健康。菠蘿嘅甜酸甜甜，令到人喺炎炎夏日更加開胃。餐湯係二揀一，一款係野菜粟米忌廉濃湯，我揀咗木瓜甘筍雪耳花生湯，湯料出奇多，飲落味道都幾清，唔似落咗好多味精，好有家常便飯嘅感覺。主菜就更加家常便飯，六選一揀咗野菌三色椒家常豆腐配珍珠糙米飯，預設係微辣，但唔鍾意嘅話，可免辣。素菜嘅微辣係開胃嗰隻，相信就算怕辣都會食得開心嘅。珍珠糙米飯質感比想像中細滑，同絲苗白飯無咩分別。飲品好多選擇，揀咗咸柑橘蜜，係童年回憶，細個喉嚨唔舒服，屋企人就會沖一杯；而家成日出街食飯，食得煎炸嘢多，飲返一杯就最好不過，亦繼續咗家常便飯嘅感覺。