樂天大喜屋 (已結業)

家姐生日，緊係要食餐生日飯啦，我地叫佢揀，佢諗黎諗去，都係想試下大喜屋，因為見網上有好多人話好味道又幾唔錯，又多款咁咁咁啦，所以佢就有多少少期望，我就無乜特別感覺，因為覺得間間放題都差無幾。入返正題，我收工先到，book左8點9,其他人到先，因為有book枱既關係，所以都唔需要話等位，但係其他人話黎嗰時門口有超級多人。蝦：新鮮好味。雪糕：算多款。天婦羅：熱既，不過淋既。芝麻雞翼：熱既，都係淋既。大腸﹑魷魚：難食｡其實總括,好多野都唔好食，中哂伏，又多本簿係剔野食既紙仔，有兩本好似好多咁，不過就重複又重複，選擇少，味道差，食到我地幾個係咁牙牙聲。臨尾cut單，佢黎收紙，話last order, 仲有無野加，我話我填埋呢張先，佢話好，轉頭收，無一分鐘，我遞紙仔，佢話已cut單，我o了咀，算，一分鐘都無，又係佢地話返黎收，算，食雪糕，好彩臨尾枝麥瓜雪條幾ok｡其實已經講唔出仲有咩好好味，呢餐飯一d都唔滿足，就好似求其揾d野塞飽自己，仲要講緊248+1,簡簡單單講一句，不能做一個回頭客。