養心殿台式養生鍋 (已搬遷) 新店位置

第一次黎養心殿打邊爐，一出lift門已經聞到好香嘅藥膳味道，眼前係好多個中式嘅屏風，環境昏暗，再加埋牆上掛住既紅色燈籠，真係比起其他打邊爐嘅地方格外有feel呀。呢度嘅湯底選擇好有滋陰養生既感覺，今次揀咗個養生鍋湯底，入邊有啲中藥呀人蔘呀，仲有啲龍眼肉可以食下，入面仲有好多舊豆腐同鴨血添。佢話係用老雞，火腿同豬肉淆成既，成個湯呈奶白色，飲落啲湯都幾濃郁，佢加湯既時候係加番啲奶白湯，唔係清水咁簡單，抵讚呀。呢個黑松露蝦丸真係好正，每一啖都有陣陣既黑松露味飄出黎，唔係淨蝦膠既味道，size幾好，唔會話食丸食飽左。自家製水餃都好足料，入面包住滿滿既蝦肉同豬肉，滿足。打邊爐真係好鐘意食炸嚮鈴，特別係有出色湯底既時候，放個嚮鈴落個湯度，由佢索曬啲汁，世界級好味。仲嗌左生菜同金菇，都幾新鮮。寬粉條都好Q彈，似紅薯粉啲friend，連湯食幾夾架。