新開業時送優惠券，人龍太長，所以到最近先一試~由於限時50分鐘製，即使要等位，時間都心中有數。
首先揀好定食，客人自行去櫃位結賬，再由店員送餐，並實施15分鐘內送餐，堂食設加一。
定食8，顧明思義有8款定食，均一定價$48，小食同樣地有8款，定價$20-$40 有刺身、雞翼等。
簡單而言，最低消費，如果唔點其他小食，53蚊埋單~
1
2
定食附味噌湯、漬物、甜點；另設自助區內白飯、湯、椰菜絲、麥茶任添！
岩鹽牛排定食 $48
賣相唔錯喎~50蚊份牛排千祈唔好講係咩靚牛…食落雖然有少少硬身，鬆軟講唔上，但唔會有鬆肉粉味~
加埋大大碗飯，唔添都飽一飽~
附送嘅味噌湯唔係開粉，都有少少誠意。
炸蝦天婦羅定食 $48
天婦羅雖然有少少厚粉，但3隻蝦都算幾大隻！另外有兩件秋葵、一件茄子~
平時日本料理，天婦羅乜乜都要3、40蚊啦，仲要唔一定好食，所以呢48蚊都算過得去！
前菜有3款，海哲、中華沙律都係爭鮮質素，不過我留意到好多客人都食剩第一款 (唔知乜)。
店家可能要換一換款式，或者even 取消呢款，無謂浪費吖。
煙燻三文魚沙律 $20
沙律賣相唔錯，煙三文魚都幾大塊，令我諗起薩莉亞嘅味道~
醬燒魷魚 $20
魷魚以言，確係比較平，不過質素都平平~相信係一早整定，所以食落硬身。
咁嘅價錢，都有如此質素，實在太唔爭鮮喇
拿~講明 佢係性價比高，唔代表高質，不過加埋一百五蚊，算係屯市唔想頹食吉野家嘅另一選擇！
留意：見好多食評都話48蚊魚生飯伏伏地 ，話到明爭鮮旗下，建議食熟食啦。
