Doux (已結業)

上次嚟呢度食過，環境食物都一流，一直念念不忘，今晚再同朋友嚟，充滿期待！波士頓凍龍蝦肉質厚，食落彈牙，鮮味十足，膏多到爆哂出嚟，用辣辣地既醬汁調過味，更加開胃！香燒肉腸圈食落幾有質感，唔會好淋，有咬口！肉鮮味濃郁，唔會有難聞既so味，而且感覺肥肉唔多，配上少少酸椰菜，一啲都唔膩濟。主菜叫左16oz既肉眼扒，嚟到果然份量十足，足夠兩人分食！顏色烤得好靚，七成熟啱啱好，火候拿捏得非常出色。牛扒鬆軟多汁，肉味濃，脂肪部分唔多，啱哂怕肥既我！配菜一啲都唔馬虎，有秋葵、黃紅番茄仔等，最鍾意番茄仔，微微烤過，咬落爆汁，正！最後點可以錯過呢度既甜品？呢個叫Lemon既甜品由檸檬乳酪mousse, 菠蘿冰糕同杏油牛油crumble組成，食落好有驚喜！檸檬朱古力包住奶香濃郁帶少許乳酪味既mousse, 中心系少少既柚子，酸酸甜甜，好好食！菠蘿冰糕就似碎左既菠蘿冰，好濃既菠蘿味，冰冰涼涼。而crumble好鬆脆，牛油味濃！整道甜品非常出色，近乎完美！再一次到訪，又系一次既驚喜，可見呢度質素之高，加上咁舒適既環境，絕對系我最愛既餐廳之一！