塚田農場 (已結業)

兩個人喺海港城搵間食肆諗住食少少嘢，估唔到閒日都好多間食排晒隊，諗住呢間琢田農場睇落都okay又有位就入去啦。講真喺出面等安排入座都覺得啲職員比較hea，咁可能佢哋忙啦，當時我哋都諗住難怪嘅。但到入座後，我哋五分鐘內就向一位身材健碩嘅男職員落好單，之後就係漫長等待。入到去其實見到無想像中咁忙，餐廳未及半滿，而職員都有4至5個喺樓面，另外有個水吧咁。等嘅過程見佢哋一直有做嘢，咁我哋都以為係製作需時，好乖咁等，但中間都有兩頭望，又悶到開game打。我哋坐喺餐廳最中心既吧枱位置，理論上應該唔會被忽視。但過咗半個鐘左右，連餐飲都未上，於是就問第二位職員追單。然後佢好唔好意思咁話漏咗無入單。漏單本身喺一個問題，但完全無留意到客人情況，本身又係另一個問題。我哋唔追單只係體諒職員可能比較忙，加上擔心被加料。以一個二百蚊左右既套餐，我認為提供基本嘅服務包括對客人一定嘅關注都係合理要求。最後我哋直接起身走，只係簡單表示唔需要重新入單，因為我哋覺得對呢間餐廳已經好失望，亦無需同職員討論啲咩。分享呢個經驗，只係想珍惜自己時間同埋有要求嘅人可以參考返。