上岸料理 (已結業)

今日同朋友又嚟左棉登徑搵野食，經過呢間小店門口既餐牌見到有熟螢光魷魚，覺得幾得意就入左去。首先有熟螢光魷魚，熟魷魚食落粉粉地，好特別，而且冇腥味。加左沙律醬同青瓜，海帶同芝麻，口感特別又清新。食日本菜點少得刺身，今次要左薄切彷彿魚伴紅蘿蔔茸酸汁。另外仲有厚切黑鯥魚，連子鯛，葉血引。四款魚都非常鮮甜，一啲腥味都冇。另外要左兩款串燒，燒雞翼同黑豚肉串。燒雞翼既皮燒到好脆，一啲油都冇。而且雞肉仍然保持到有汁。黑豚肉油份就重d，但燒過嘅脂肪食落都好香好易入口，亦成功令豬肉完全唔鞋。再要咗一份炸南瓜餅，食第一啖已經食得出用咗日本南瓜，味道超級甜，而且外層亦都炸到好脆，名乎其實嘅外脆內軟。最後要左一份熱辣辣嘅清酒煮文蛤蜆，蜆既size夠大夠飽滿，完全冇沙亦好鮮甜，而且清酒嘅味道亦唔會太搶，蓋過蜆肉既鮮味。呢度環境好舒服，因為枱數唔多，比較安靜適合傾計，下次再過嚟試吓其他食物先！