影片
更多
2013-06-16
62 浏览
記得以前細個，小學門口有個走鬼檔，齋賣沙嗲牛串，因為即燒即賣，香氣四溢，好多學生哥圍住個檔口幫襯，仲有啲印象賣5毫子一串，非常搶手，亦喺人生第一次接觸咩叫做串燒。近年，串燒大行其道，衍生唔少串燒專門店：川燒、香香燒、串皇、蜀一燒、明串燒、串串貢、串得起、龍蝦燒……‥不勝枚舉，總之晌openrice打串燒搜查，都不下過百間，仲各有特色，大家揀邊間真喺各適其適，食得招積，所以依個戰場都鬥得幾劇烈，要突圍都實在唔容易。今日有幸嚟到位處染布房街、離地鐵唔遠新開無耐嘅「安安燒」試菜（由旺角站或旺角東站行過嚟都OK），盡嘆多款川式串燒，實要多謝公關及店方邀請！店家打正旗號賣「川式串燒」，自然調味方面跟「花椒粉、孜然粉、特辣粉」等掛鉤，不過，香港人一向多心，又想乜都試，況且川式香料未必人人都啱，所以老闆都加入咗芝士、蒜蓉、沙茶醬……等調味配料，仲晌醬汁方面都搞咗啲鬼馬創意，例如：果占釀牛丸、火灸海膽墨魚串、朱古力燒生蠔。故此，晌鋪面都貼有雜誌嘅相關報導，以及一啲特色或必試推介。今日老闆既熱情又慷慨大方，開放全場，招待30多位食家一齊反串星期日，場面非常熱鬧。最開心莫過於試到好嘢之餘，又撞到唔少相熟嘅
店家打正旗號賣「川式串燒」，自然調味方面跟「花椒粉、孜然粉、特辣粉」等掛鉤，不過，香港人一向多心，又想乜都試，況且川式香料未必人人都啱，所以老闆都加入咗芝士、蒜蓉、沙茶醬……等調味配料，仲晌醬汁方面都搞咗啲鬼馬創意，例如：果占釀牛丸、火灸海膽墨魚串、朱古力燒生蠔。故此，晌鋪面都貼有雜誌嘅相關報導，以及一啲特色或必試推介。
今日老闆既熱情又慷慨大方，開放全場，招待30多位食家一齊反串星期日，場面非常熱鬧。最開心莫過於試到好嘢之餘，又撞到唔少相熟嘅食家，以及認識咗唔少新朋友仔食家。其實安安燒室內裝修簡單，入門口右邊喺廚房，左邊就喺用餐區，活動式深啡木枱木櫈，牆上貼有各款串燒菜名，當然，點菜就唔使睇住埲牆，枱上插有A4大細底面兩頁橙色嘅點菜紙，連飲品，分咗8大類，有名有編號，部份串燒仲有埋彩色圖片參考。
基本上，餐牌中嘅8大類按序分別喺蔬菜果瓜類、必試推介、刺身類、肉類、海鮮類、丸類、特色甜品類及飲品類。正當大家都頭痕揀試咩好之時，原來店家早有安排，已準備定22款串燒俾大家品嚐，無錯，真喺有成22款，仲要如果有咩其他想試嘅，可以另外追加再點，所以小弟食評個標題點可以唔用「盡嘆」二字吖。好喇，開場白講多咗，飽餵相機，喺時候輪到小弟跟大家分享各款串燒滋味。由於所試款式實在太多，為方便大家睇，就按番店家嘅分類嚟寫。
本應點菜紙嘅第一類喺「蔬菜果瓜類」，不過，小弟認為既然叫得「必試推介」，應當放晌第一位重點推介俾啲客啩，所以我覺得店家晌分類編排上唔夠突出，可能需要再作調整。此外，編號亦喺另一個問題，首先編號唔喺完全順次序，有時啲名稱長，就會用編號代替，三幾個朋友討論食咩時，就會左搵右摷。再者，大可以字頭順便做埋分類編號，例如：1XX喺「必試推介」，2XX喺「蔬菜果瓜類」，方便系統管理及數據分析。必試推介
1.燒雞泡魚乾（$46/客）- 魚乾頗厚身，所以口感挺煙韌，有少少焦香，味道如一般魚乾。
2.烤獨家超滋味高級吊片魷（$78/客）- 吊片即喺風乾嘅鮮魷，比鮮魷仲要貴，因為魷魚味濃縮啲，海水鹹鮮味又重啲，不過孜然粉下得好重手，最後咬落就得孜然粉味。
3.芝士煙肉通心粉釀蟹蓋（$33/個）- 原個蟹蓋幾有睇頭，點點蕃茄粒、煙肉碎跟通粉釀入蟹蓋內加芝士燒，若果唔喺啲通粉有過腍情況，又濃又香絕對得人歡心。
4.必食芝士蒜蓉燒生蠔（$74/四隻）- 芝士、蒜蓉兩大惹味名物，個燒生蠔真喺無得輸咁滯，況且啲生蠔本身都夠肥美鮮甜，又燒得啱啱好無過熟，入口滑溜，今日推介之一。燒生蠔除咗依款外，晌海鮮類一欄仲有兩款「單拼」選擇：「安安特色香濃芝士燒生蠔」（$52/三隻）、「金銀蒜蓉燒生蠔」（$68/四隻）。
5.皇牌燒牛舌（$28/串）- 一串有3件，厚度適中，孜然粉味吊起牛舌獨有嘅羶香，幾濃郁，好食。6.安安首創果占釀牛丸（$26/串）- 獨家創意菜式，一串4粒，牛丸挖空一小截燒好後塗上果占，果占有士多啤梨、藍莓同橙味，味道甜甜鹹鹹頗有趣，但稱唔上好夾。
7.極品烤餃子釀雞翼（$30/兩隻）- 依個雞翼唔喺安排試食之列，喺我跟另一位食友另加，何謂「餃子」？初時諗佢喺咪將隻餃子釀入雞翼嚟燒咁玩嘢，當然唔喺，只喺講個做法，好似包餃子咁，將免治豬肉釀入去加啲孜然粉再燒，燒嚟幾香，外皮又夠脆，過癮在拆晒骨入口啖啖肉。
8.秘製醬燒雞中翼（$36/四隻）- 雖然有點燶，但甘香皮脆，可是既然叫「秘製醬燒」，但入口都喺孜然粉味喎？9.必食火灸海膽墨魚串（$36/客）- 賣相幾的骰，以小竹籤串住燒，墨魚幾爽口，雖然海膽味唔算好突出，但仍覺得甘香惹味。
10.燒超美味一口甜薯（$22/串） - 一串有5粒細細嘅紫薯，又粉又甜，一啖一粒，不過有啲燒燶咗要扣分！
11.燒甜美地捫菠蘿（$18/份）- 一向都鍾意食燒菠蘿，燒過嘅菠蘿會令糖份濃縮啲，所以感覺特別清甜，而且師傅已將菠蘿切為小件，方便食用。如果糝啲肉桂粉吊味，效果仲正，此外，佢哋有燒菠蘿，但無燒香蕉，其實燒香蕉一樣好食！錯，喺有，只喺擺咗晌甜品一欄，加糖漿脆燒，名為「甜蜜脆脆糖燒朱古力香蕉」啫。
12.燒鮮味海蜆（$44/客）- 海蜆以錫紙包住燒，一客都有成十多隻，可揀蒜蓉或海鹽燒，當然蒜蓉惹味好多，蜆肉肥美，不過略嫌佢下蒜蓉太太太重手，冚過蜆嘅鮮味。13.頂級鹽燒多春魚（$30/四條）- 對多春魚唔喺太好，所以小弟對佢無咩評價。
14.安安爆爽豬頸肉（$36/客）- 一客有5件，肉質甚爽口，帶微辣，頗惹味，缺點喺鹹咗啲。
嘩！必試推介17款嘢小弟都試咗當中嘅14款，相信都大致算喺了解到店家嘅手本嘢、強弱位晌邊，臨尾再講。蔬菜果瓜類
1.惹味蒜蓉生燒茄子（$29/份）- 原條半呎有多嘅大茄子開邊加蒜蓉、辣粉烤燒，香氣撲鼻，茄子入口軟腍又惹味，值得推介。
2.燒韮菜（$14/份）- 竹籤串起嘅韮菜一份好大碟，韮菜成本相對成本平吖嘛，韮菜食落多汁，不過菜質頗韌，唔易咬得開，食得好「嗱搞」！
3.燒香甜粟米（$18/條）- 一條粟米已分好3截，粟米果然夠甜，咬落脆卜卜，但又喺孜然粉，都喺牛油襯佢啲。
4.惹味醬燒金菇（$28/份）- 以鍚紙包住嚟燒，上枱時超熱辣，冒晒煙。金菇吸滿以沙嗲為主導嘅惹味醬，又帶點甜，水準不俗，值得一試。
此外，其他款式如燒清新鮮露筍、沙茶醬燒雞脾菇都喺想試之列。
刺身類．丸類依兩小類款式唔太多，前者只有3款，後者得5款，是日亦無提供試食。
肉類
1.燒美味廚師腸（$10/串）- 廚師腸可以有幾美味大家心裡有數，一包晌超市賣幾多錢走一轉就知，所以唔覺得要放晌餐牌度賣嘅串燒。倒不如賣燒德國牛仔腸、豬肉腸、台灣嘅黑椒腸，嚟得吸引啲囉。
2.燒一口午餐肉（$16/串）- 厚切嘅午餐肉隔住青椒嚟燒，跟你晌屋企煎午餐肉分別唔太大，睇唔出有咩特色，除非你喺午餐肉粉絲，無午餐肉不歡，或者想過過口癮，否則大可不必晌度食喎。
肉類一欄共14款，只提供兩款唔起眼嘅串燒，本想另點燒羊肉串、燒加拿大牛肋條串（無骨）……等等，可惜噚晚半夜才收鋪，此刻未預好貨，故此肉類試唔到佢嘅真章。
海鮮類1.蒜蓉燒扇貝（$42/四隻）- 除蒜蓉燒，亦可揀芝士燒，都喺賣$42/四隻。隻隻扇貝鋪滿金銀蒜，勁香，扇貝厚肉，正呀！四十零蚊有四隻，用料不賴，抵食喎，又喺值得介紹。
2.沙茶醬燒深海大墨魚咀串（$27/串）- 墨魚咀脆口得嚟挺煙韌，好有咬口，配沙茶醬辛香惹味。
雖然海鮮類只俾咗扇貝同墨魚咀我哋試，但計及必試推介中嘅生蠔、墨魚、海蜆幾款，海鮮燒烤菜式做得唔錯，其實仲想試佢嘅燒鮮味蟶子（$44/客）、燒原隻虎蝦（$66/隻），不過太貴而有啲唔好意思呢！
特色甜品類1.甜蜜脆脆燒棉花糖夾餅（$12/客）- 睇番餐牌參考相片，一客應該得兩件，唔好被我哋啲相誤導。依個燒棉花糖夾餅真喺非常有驚喜，燒棉花糖食過，麥芽糖夾餅亦都食過，依家個燒棉花糖夾餅猶如兩者合體變身，同樣好正，棉花糖軟綿香甜，梳打餅烤燒後更香脆帶些微焦香，內裡仲加點朱古力槳，好有畫龍點睛之效，真喺必試推介。
2.香芋雪糕配脆脆雪糕筒．石板街雪糕配脆脆雪糕筒（$26/客）- 定價似乎有點貴，採用阿波羅雪糕，帶點冰冰之感，但未見特別。
本來仲有一款甜品「明月冰卷（紅豆/綠茶）」（$16/客），由於來貨關係，未有提供。估唔到作為一間串燒店，竟然有咁多甜品款式揀，基本上叫做有11樣嘢，但有一列喺唔同味嘅雪糕，但點都叫有唔少選擇，但一道「甜蜜脆脆燒棉花糖夾餅」足以令人刮目相看。
飲品類留待最後介紹，因為一般人嚟串燒專門店都喺為啲串燒，但安安燒晌飲品方面都唔俹簁，罐裝啤、支裝啤、生果啤、冰紅茶、汽水、王老吉、紅酒白酒、汽酒……十多款。小弟返大陸做嘢避免喪「敬酒」，一向都喺以王老吉代酒，話晒王老吉都算喺國宴指定款客飲品，唔好睇少佢，你見安安燒定價就知，賣$14/罐，貴過晒罐裝啤同啲汽水。況且，王老吉清熱，今日食咁多燒烤嘢點都要清清熱啦！
總括吓今日嘅體驗，安安燒位置算方便，旺中帶靜，好似附近廣華街嘅新星一樣排晒隧等打鞭爐，所以食物做得好一樣有得做。用料方面，試得出有水準，價錢OK，只喺有少部份定價略貴，不過，款式上小弟覺得有調節需如，尤其一啲唔起眼、無特色嘅，要刪走，就正如上文所講嘅燒廚師腸。相反，一啲特別又有驚喜嘅款式，就要重點啲推介，唔好以為晌點菜紙加啲「店長推介」、「本店招牌」嘅公仔無乜意思，好多時作為顧客見到張點菜紙60、70款嘢，花多眼亂，真喺睇住啲招牌嘢嚟點架。聽店主講，本應有3個師傅負責燒烤，但我哋食場「午間特別場」只可安排到一個師傅，故此，出品嘅水準未太穩定，就如上文所述有燒燶、過鹹嘅情況，亦有啲下調味料太重手，蓋過食材鮮味，依啲都喺要注意地方，但相信唔難改善，可以做得更好。最後想講調味，眾多食家試完今餐都有一種感覺，就喺調味太單一：「乜又喺孜然粉呀！」其實稍稍留意，今日所試嘅菜式中，有花椒粉、孜然粉、辣粉、芝士、金銀蒜、沙茶醬、果占、朱古力漿等等，不過今日預先所安排嘅大多數都喺用上孜然粉，所以，大家嚟幫襯時要「平衡」選擇。祝店家食物精益求精，生意越燒越旺。溫馨提示，緊記安安燒開6:00pm-3:00am（星期日至四）、6:00pm-4:00am（星期五、六），咪學我哋晏晝嚟試串燒喎！
张贴
