孖啡 (已結業)

登打士街呢頭一向係cafe 聚腳點，同朋友兩個求奇入左間，諗住Hea 下時間等睇戲，估唔到竟然有啲驚艷。門口走樸素路線，都尚算可以。餐牌同餐具都算簡潔，唔浮誇。「誠意拳拳」白汁煙三文魚天使麵，白汁夠濃、夠味。面頭既煙三文魚都算有誠意，捲成花形再上面。整體外觀都吸引。天使麵煮得恰到好處，食落雖然多汁，但唔會煮到爛爛的。「喧賓奪主」凍朱古力個貌相幾唔錯，一黑一白，配搭搶眼。面頭啲忌廉唔係好甜，但加埋朱古力飲落有啲膩。可能係因為朱古力太甜，甜到唔似飲緊朱古力。又可能係因為未食任何野就飲，所以覺得有點甜。「目不遐給」瑞士雞翼擺盤幾好，有燦爛鮮花既感覺。雞翼色水就滿有光澤，新鮮即造。但咬開果陣，雞肉依舊潔白。建議可先用刀開雞翼中間位置，等個汁滲入肉中間，相信會更好味。「相互輝映」心太軟係我成餐飯最驚喜既。蛋糕中間冇過熟，成功有流口效果，而且當中既朱古力熔岩仲有好多。雪糕係雲喱拿味，下層仲有忌廉墊底。個人認為加埋忌廉會令到心太軟更膩，呢層似乎可以唔加。但整體而言係好食既！