高高酒家 (已結業)

呢一間酒家都唔係第一次幫襯，雖然環境唔係稱得上好好，但勝在食物好味，價格相宜，所以最近幾次嘅家庭飯聚、做節或朋友聚餐都選擇係呢度

媽媽住喺葵涌區，佢平時只會去荃灣區用餐，冇乜必要都唔會離開呢個地區，佢話荃灣區已經大把嘢食，唔需要去到咁遠！但自從佢去完高高酒家食過後，佢竟然主動話下次可以再嚟，可想而知佢對呢一間酒家有幾喜愛

今晚一行7人又去咗高高酒家補祝母親節，每次去高高酒家都會必叫冰川無骨咕嚕肉及避風塘賴尿蝦肉，身邊朋友或屋企人都對呢兩道餸讚不絕口，今次當然都唔例外要order呢兩道餸啦！

冰川無骨咕嚕肉

避風塘賴尿蝦肉

除咗呢兩道餸，我哋仲叫咗六道餸，包括豉椒炒花甲、黃金桶蠔、拍薑芥蘭、黑椒薯仔牛柳粒、高高小炒王和紅燒豆腐煲，媽媽對所有菜式都好滿意

1

黃金桶蠔

拍薑芥蘭

豉椒炒花甲

今晚7個人總共叫咗八道餸，又叫左幾枝啤酒，又自備蛋糕，但埋單都唔過$1500，又唔收加一服務費及切餅費，真係好抵食