漁釧 (V Walk) (已結業)

南昌屋邨個邊有個新商場，真係好少可走去南昌，唔係因為約左M先生行街都唔會走過黎。係唔知食咩好既時候，見到有一間日本野好多人等緊位，見到係新野就想試下。佢地既菜式都幾多，但因為暫時好多野都唔食得住，所以都係揀返普通幾樣野。海鮮海膽炒飯，見到面頭既海膽就已經好吸引，而且佢都真係幾多海鮮料係入面，有蝦、蟹柳、魷魚等等，飯炒得都幾香口，但建議唔好將海膽撈勻成個飯黎食，否則就會唔見曬D海膽！香芒大蝦卷，芒果甜帶微酸，真係好微微既酸，甜多過酸，入面包住炸蝦，幾好食，唔錯！鹽燒牛舌串，牛舌好香牛味，而且軟韌適中，連冇咩牙力既我都食得到，唔會淡味亦唔會過份鹹，呢個絕對值得再encore！黃金軟殼蟹，非常邪惡，勁多鹹蛋黃，勁香勁有味，而且軟殼蟹本身已經炸得好香，呢個真係唔食對唔住自己，但一次過食太多會好膩，必點item！唐揚雞軟骨粒，比平時食既還要大粒，多肉，炸得香口，蘸埋蛋黃沙律醬就好味，M先生至愛！餐廳裝修都好靚，坐高檯位仲可以睇住師傅整野，奉上既茶應該係玄米茶，係我至愛，連豉油碟都好有心機係有圖案係上面，一倒豉油就見到，而且好幾種野食都十分好味，呢間日本料理餐廳十分推薦！