殿 大喜屋

营业中

休息中

睇到網上有人推介呢度有拖羅刺身任叫，即刻book位食lunch。每位$298加一，比其他午市放題貴，但見人推話有拖羅又有薄燒牛、又有炒蟹咁，好似都抵食。去到一坐低即刻QR code落單叫9片拖羅同其他刺身試試先，盆刺身等左10分鐘先黎，嚟到得三片拖羅，我哋三個人叫九片佢比三片，其他刺身又比足，淨係拖羅比少咗，即刻再落單靜叫拖羅12片，等咗15分鐘先到，又係得三片。如是者再叫咗幾次，不論你落幾多，佢永遠都係得三片，起碼要等15至20分鐘先到，仲有兩次漏單，食兩個鐘叫咗起碼八次以上，黎得六次，計返每人都係食左6片拖羅，D拖羅仲要好細片，質素又一般，有兩次仲要係好瘦又接近赤身咁色。所以如果諗住食拖羅先去嘅可以唔使考慮。其他熟食都係一般平時放題質素，網上睇好多人推介佢個避風塘炒蟹，食落啲蟹有少少臭，係靠個蒜蓉去掩蓋啲臭味，味道非常一般。扇貝唔好食，花膠成塊豬皮咁，炒牛柳粒一般，海膽手卷冇咩味道～唯一覺得好食嘅係簿燒牛肉，但係又係叫10次來五次，每次都係三片。貴價雪糕每人限一杯。呢間放題漏單情況嚴重，數量又不足，計返非常唔抵食。