好食雲南米線

营业中

休息中

好食雲南米線，我見到呢個名咁有自信，二話不說就到走入去試一試，我見到收銀位置有“大家食“的樣，應該係同一個老闆喇。店內唔大，咁啱俾我見到有個卡位，就坐落去，睇一睇Menu都唔算太貴，正常價囉，又唔係好平，黎得一定係試一試佢個麻辣湯米線喇!!(雖然我唔係食得好辣，但係我好鍾意麻辣個種麻麻地嘅感覺)睇睇下發現原來麻辣底係要加2蚊架!!唔緊要喇，好食就得喇!!我叫左2小辣，配牛肉，魚腐同貢丸，每一款餸加6蚊，再加多一個凍奶茶先!!好快，有得食，我見佢寫附送韭菜、蘿蔔、腐皮同豆卜，原來配料的分量唔係好多，啲蘿蔔切得好薄，一啲口感都無，韭菜得幾條，都OK喇，唔洗錢，雖然有好多餐廳都唔會加咁少配料。我見個湯底色水唔差，我習慣先飲一飲個湯，唔太辣，正常呀，我叫嘅係小辣呀嗎，但都唔麻的確係有少少失望，米線，不夠軟滑，而且有一點"痴"住，好明顯係一早已煮好啲米線，唔係即叫即煮，而魚腐唔係我平常食到，一大塊的，而變成好似一粒魚旦狀，但唔係好淋，好滑的口感。講到咁，好似好差咁，不過最後牛肉唔太差，無筋，唔太硬，過得去喇。最後試埋杯凍奶茶，一般喇，無咩茶味，如果你問我會唔會再黎，我應該未必會。