越Home 越式料理

星期六晚上，隔離幾間裝修比較精緻嘅食店都大排長龍，但呢間唔洗排隊。可能因為裝修比較簡陋，燈光白光，少少暗。不過之前食過幾次味道都唔錯，所以決定入去食。

今次叫豬頸肉湯河加熱阿華田（$59，免加一）。

豬頸肉湯河

一嚟到，湯河非常大碗。鍾意佢豬頸肉同河分開上，啲肉唔會淋哂。豬頸肉非常入味，彈牙唔韌，有少少燶邊，份量多，好滿意。河粉軟滑，量多；牛骨湯濃，稍嫌有少少咸，自己加咗少少水，味道就啱啱好；白蘿蔔清甜無渣入味 。

熱阿華田亦非常值得一讚，雖然用膠杯裝，但次次飲都咁香濃，係茶餐廳質素阿華田。

總括而言，周末晚市呢個價錢呢個質素，非常滿意。