759車仔麵 (已結業)

喺Mega Box食lunch食到悶決定行遠少少去九展食車仔麵。呢度奉行先購票後入座嘅型式，買飛後侍應姐姐就會幫你搵位坐。我覺得咁樣做法又真係幾efficient，一來一個人嚟食飯唔駛擔心無位，二人同行又唔洗話我去霸位你買先再到我買咁麻煩。其實車仔麵只要夠熱，個醬夠惹味，再配搭油麵就一定唔會差，759做足曬以上要求。清湯本身已經好夠味，唔食得辣嘅人叫清湯都一樣夠曬腩味，但佢個四川麻辣醬真係不得不叫，你見佢一湯匙辣醬有花椒有泡椒，真材實料並非後期添加嘅辣醬，花椒令佢嘅辣味變得有層次，先有鮮香，後來帶有麻味，隱約亦會食到豆瓣嘅甜味，用上真正辣椒做出嚟嘅辣醬先會做到咁醇厚嘅質感，同時會有種喺個胃度暖返出嚟嘅感覺。而蘿蔔亦都好impressive，好清甜煮到好腍無起渣，索曬湯底嘅麻辣汁。冬姑好入味好厚身，亦都無腥臭味。油麵亦係大路嘢，無咩幾可會煮到難食。整體嚟講30幾蚊食到碗咁上下質素嘅車仔麵，我覺得比起我去Mega Box食啲偽日本拉麵食得仲開心喎，而且排隊時間只係幾分鐘左右，絕對啱附近返工嘅人士！我見有人話呢度啲姐姐無乜禮貌，事實又唔係喎，同行友人叫咗麻辣湯底後食唔到，姐姐亦都好幫手拎去廚