呂仔記 (已結業)

我鍾意掃街嘅原因係可以食唔同嘅小食，樣樣都食下，復活節幾日假期，當然係掃街覓食好時機！每次去東大街掃街一定唔少得呂仔記，主要賣港式甜品小食，魚蛋燒賣、粉果、碗仔翅、喳咋等等。住喺港島東嘅朋友一定聽過呂仔記，細細嗰陣，媽媽成日帶我嚟食，話係佢兒時回憶，嗰陣仲係街邊車仔檔，做到上檔頭，幾十年，食嘅除咗味道，一定仲有人情味。嚟得呢度，真係無可能唔食佢個自製鮮魚肉燒賣，價錢係我食過咁多間最貴嘅，三十蚊八粒，不過，可能人手製造嘅關係，每粒都大大粒，口感爽口彈牙，食得岀係人手打嘅，而且食到有魚肉味，手打燒賣之中，佢真係無得輸！一間餐廳就算食物幾岀色，但服務態度都好影響客人回頭率。當日，小妹唔小心倒瀉咗辣椒油，我地已經連忙道歉，及有幫手清理，不過，侍應姐姐態度依然差，呢方面值得改善！