翠園

营业中

休息中

新年同屋企人去翠園開年，第一次帶男友同屋企人出去食飯，原本應該一家人開開心心，點知撞到個態度差嘅侍應，舉手叫佢幾次，望一望，都唔過來，請佢幫手影張相，話好忙，真係乜嘢態度？而家做餐廳包影相梗咖啦！就算喺街三九唔識七叫我幫手影我都會幫啦，何況做服務業、做餐飲？而且明明佢無做緊嘢，反而其他侍應傳緊菜。隔離枱見狀反而自動話幫手影，慶幸呢個世界仲有好心人。新年流流，我都唔想掃興，所以都無話佢，不過呢度真係要呻一呻，話晒第一張屋企同男友合照。講返啲嘢食先。美心集團，出品係唔錯。我食過好多次，屋企附近呢間都已經食過。鮮蝦帶子豆腐羹 - 清清哋，ok。燒腩仔 - 真係好好味，好脆。讚！推介！鮮菌炒翡翠苗 - 清清哋、爽口。糯米蒸虎蝦 - 兩隻虎蝦開邊4份，加糯米飯蒸，入晒味，好好食。一品砂鍋飯 - 濕炒飯，ok。士多啤梨脆肉排 - 粉少，肉厚，雖然細粒，但士多啤梨味好入味，好咬口。