雞扒當然係榮式嘅王牌，自己其實好少選擇雞/雞扒飯，因為只要餐廳稍為失手，雞肉就會變得乾爭爭，白白浪費咗個主菜。眼見只係普通茶記，當然擔心水準，但既然識食同事大力推介，所以都試咗。
既然唔放心，就當然揀兩個主菜㗎啦，所以揀咗藕餅，因為都比較少喺街食到（當然可能只係因為我大鄉里）。
結果上菜嘅時候，一見到塊雞扒就知道唔會令人失望，肉質非常之鮮嫩，而且非常juicy，而藕餅亦都爽脆，配合薑蔥，整體味道非常有驚喜。
影相當日就叫咗跟飯，及後再幫襯嘅時候就嘗試過出前一丁，坦白講以咁普材料計，味道真係算中上，但其實價格亦都比一般茶餐廳高，坐得又唔係好舒服，所以之後都少去咗。
而且諗深一層，其實調味都幾重手，而且多數都係煎炸食物，要確保自己有足夠quota / 運動先至好食。
