麵館皇

一入到去叫咗碗酸辣湯水餃刀削麵，飲豆漿。坐咗一陣，碗麵黎喇，一起手開始食，個阿姐問都唔問就突然拎走我碗麵叫我去對正門口另一張檯，話繁忙時間將就吓，有冇搞錯，果張檯係6人檯已經坐咗5個人，我坐緊3人檯咪又係要搭檯，有乜野分別呢？！我話唔轉喇繼續食麵，佢就拉開我隔離張凳，張凳上面有我個手袋，手袋裡面有部電腦，成部電腦就畀個阿姐掃咗落地，仲加咗一句「我真係睇唔到你有個袋喎」，請到呢啲員工，真係三生有幸！

講返碗麵，真係難食到High High！酸辣湯正常應該係一半酸一半辣的嗎？呢碗極品只有酸沒有辣，而且疑似落錯份量，好似食緊一碗醋浸麵咁樣樣，酸到阿媽都唔認得。結果食咗2啖就走人，盛惠 $58。

又講吓隔離搭檯2位食客，佢仲慘過我，叫牛腩冇牛腩，叫担担麵冇担担麵，叫炸醬麵都冇炸醬麵，阿姐話賣晒唔得閒整，想食牛呀食牛展啦，就咁就被食牛展，到叫野飲，人地都未講飲咩，阿姐又話飲豆漿啦就寫咗落單，全檯O晒咀，食客又被飲豆漿了。

哭臉！哭臉！哭臉！