留白居酒屋 (已結業)

今日天氣好好，所以想同屋企人出去食嘢，之前經過虹橋見到呢間留白居酒屋，一直都好想試。去到門口咁啱好好太陽，出邊影相好靚，門口嘅牌匾同埋布幕好有特色。我同屋企人嗌咗兩個常餐，分別係一個特色丼飯同埋一個自家製烏冬拼炸雞，另外再嗌多個炸墨魚咀。首先會比一個沙律同埋一杯熱茶你，沙律冇咩特別。烏冬嚟到係熱辣辣，個石鍋外面唔會辣手，但係可以保持入邊嘅烏冬同埋湯嘅溫度一段頗長的時間，我哋食到最尾都仲係熱嘅，呢點好值得讚賞，蕃茄湯係自家製，食唔出有任何味精， 蕃茄味濃，拼烏冬同炸雞幾好食，炸雞嘅炸粉亦都非常薄，入面嘅雞好嫰滑。特色丼原來係滑蛋拼吉列豬扒丼。個滑蛋炒得好滑，吉列豬扒炸得好恰當。墨魚咀係全餐飯嘅驚喜，呢度嘅炸物處理得好好，查粉非常之薄，墨魚咬落去好鮮咪同有嚼勁。呢個價錢嘅常餐非常抵，下次會再嚟食，希望開返晚市之後再嚟試佢嘅串燒。