Catee (已結業)

係荃灣，有情調既餐廳我諗Catee可以佔一席位！裡面的畫、播放中既電影全部有關貓，木枱加上蠟燭，成間餐廳都浪漫起黎！見到set有湯、沙律、甜品同飲品，比起散叫好似平好多，所以我地最後叫左2個set，英式炸原條海鱸魚柳薯條伴他他醬同黑松露野菌燴扁意粉!首先上菜既係麵包，我諗係竹炭製成，好香，但由於本身都酸酸地，建議大家可以唔使再點醋！湯係鷹咀豆湯，好足料，仲飲到一粒粒既豆碎，加上忌廉湯，變得好濃郁！沙律就係正常，冇咩特別！之後見到前菜雙影帶子配黑魚子幾吸引，忍唔住叫左，帶子大大粒，魚子就酸酸地，岩岩帶出帶子既鮮味到主菜出場 - 英式炸原條海鱸魚柳薯條伴他他醬係好！大！碟！2大條炸魚，薯條又一大堆食落去仲見到炸魚有魚皮，真係原條！薯條就比正常幼，但岩岩好，冇咁膩！個他他醬都幾特別，有d酸瓜係裡面！黑松露野菌燴扁意粉係推介！扁意粉軟硬適中，汁就散發住淡淡既黑露味，濃得黎又唔鹹是日甜品係朱古力蛋糕，劃上圓滿句號！順帶一提，呢度既清水唔止清水咁簡單，有青瓜係裡面，感覺上好清熱！