德美壽司

营业中

休息中

呢篇係我以顧客身份寫嘅第一份食評，給香港各區朋友參考。食過香港好多地區嘅日本料理，大埔呢間德美唯獨令我一而再，再而三，再而四地光顧，值得推介比其他區嘅朋友，或者大埔街坊過嚟試吓。大埔德美，無論喺熟食、刺身、壽司各方面，師傅團隊都好有水準同製作嘅熱誠，亦會願意盡量配合顧客一啲簡單要求。無論單點多個串燒或壽司，如果唔想太多細碟佔枱面空間或者逐樣上嘅話，係可以向侍應提出落單嘅串燒、壽司，全部各分別擺喺一個大碟度，師傅自然會同你擺靚靚佢，正如我上載嘅相片所示，喜歡拍照打卡嘅話，擺喺同一個碟度，所有食物就一目了然，亦會比一個細碟放得兩三串來得更有美感。當然呢個要求亦要視乎廚房、廚吧師傅因應顧客嘅柯打情況判斷是否可行，始終不同嘅串燒或壽司，製作有先後次序，所需時間亦不同。想品嘗日本料理之餘，又想打個靚卡嘅話，可以參考相片中嘅串燒同壽司菜式。特別一提，晚餐嚟德美食日本料理，一定要配埋清酒，品嘗美食過程飲吓清酒，可以講係人生其中一種享受，但緊記切勿酒後駕駛。至於大埔德美嘅侍應同師傅團隊比咗我一個良好嘅印象，就係同顧客健談，而且有人情味，或許大家都係大埔人吧。