丸十あぶり牧場 (已結業)

久聞丸十燒肉大名，今次到我哋食喇！唔理喇，叫個究極燒肉二人前set 先！先上嘅係刺身盛，細細碟但都滿足架，食材幾鮮甜！比起其他燒肉店，呢度有海鮮拼盤食，有新鮮感！蜆肉大隻都夠厚，但印象最深係好清甜！都話海鮮夠新鮮，最好梗係要用蒸同燒嘅煮法，最原汁原味！至於蟹腳都好惹味，咸味比較重，同清新嘅蜆肉有對比，好味！不過燒肉點都係牛牛做主角嘅！其中一種肉叫「和牛紐約客」，一開始真係一頭霧水，原來佢係取自牛嘅前腰脊部肉，因為運動量少、脂肪多，燒肉最啱！俾我嘅感覺佢係脂肪同肉都幾分明，牛味好夠！至於喜歡霜降和牛嘅朋友仔，就要試真啲和牛肉眼，入口即融，唔落山葵感覺都唔肥膩，幾高質！最後最後推薦大家，一定要試試個雞泡魚乾！個魚乾係好小食feel嘅，一碟仔有十幾條，一絲一絲嘅口感已經好有趣，而且甜甜哋，餸酒最啱！