和花亭壽司 (已結業)

已經去過幾次，但仍然覺得好好味，最鍾意就係試呢度嘅廚師推介。每次都差不多一定叫以下呢幾款食物，因為實在太好味喇:1) 鹽燒三文魚鮫2) 甜蝦刺身3) 滑子菇味增湯4) 四色軍艦壽司5) 三文魚子壽司6) 三文魚壽司鹽燒三文魚鮫係我嘅至愛，其它分店冇得食架，件魚鮫外層燒得好香脆，裡面啲魚肉又鮮味，一路食啲三文魚油就慢慢滲出嚟，真係諗起都流晒口水呀。不過如果想外層脆卜卜，裡面又熟透的話，記住同waiter講燒耐少少。甜蝦刺身夠晒鮮甜同抵食，超級推介﹗其實和花亭啲湯真係唔錯架，滑子菇味增湯係其中一款，有好多菇菇，仲有兩三舊好滑嘅豆腐，正﹗四色軍艦壽司呢，唔.....其實味道就冇乜特別，不過賣相幾好。呢度啲三文魚子算幾大粒，好好好新鮮，所以次次都要食，好似只係廿五蚊一碟，ok抵哎﹗三文魚壽司只買九蚊碟，但就絕對冇將貨就價，大大件仲有脂肪，好抵﹗呢間有時仲有冷麵食，我本身對冷麵冇乜興趣，但係撈埋啲麻油食又真係幾好味架。最衰嘅就係次次都排長龍。不過我就一定會繼續支持﹗