生記鮮魚湯米線 (已結業)

因媽咪極力介紹下，所以就去生記開餐。點知我地一坐低冇耐，媽咪突然有事要走先，最後得番我同細佬二人。但我媽咪臨走前已經代我地叫咗兩個『什錦米線』佢話可以樣樣都試到喎！之後佢細細聲響我耳邊話︰一定要飲啲魚湯呀，好好味，冇味精咖... 真係俾佢個行為笑死！等咗一陣，見到兩大碗嘅米線放響我地面前... WoO... 啲湯真係好似奶咁白囉！即刻急不及待飲一啖試吓... Hey, 個湯真係得喎！唔怪之得我媽咪極力推介啦！之後就開始食喇，因為我細佬唔鍾意食鮮鯪魚肉嘅關係，所以佢夾哂俾我，咁我第一樣就係食鯪魚肉喇！我覺得啲鯪魚肉好好味，仲食到少少果皮添... 好正！反而其他餸我就覺得普普通通... 雞中翼︰好一般，唔食都唔覺可惜魯肉︰都可以，不過個人覺得啲味用嚟與米線同吃有啲怪怪地魚付︰呢個真係食完都唔知係魚付，我仲以為係煎爙三寶果啲炸鯪魚球添，係之後我媽咪話番俾我聽至知係魚付... 我覺得唔好食，同我以前食果啲都唔同，而且真係太似炸鯪魚球喇！魚片頭︰一般街市買到嘅貨色，唔特出絲瓜︰雖然夏天瓜係靚過菜，但係... 俾啲瓜落去唔係咁好睇囉！就算有下次，我都只係會叫『鮮鯪魚肉米線』食囉！